“Xəzər Lənkəran”ın sabiq baş məqşçisi Cüneyt Biçər Ukrayna və Polşanın birgə təşkilatçılığı ilə keçirdikləri “Avro-2012” matçlarını dəyərləndirdi. Türkiyəli çalışdırıcı Korner.az saytına verdiyi müsahibədə sabiq komandası “Xəzər Lənkəran” haqda da danışdı.
– Cüneyt bəy, ilk olaraq Avro-2012 oyunları haqda fikirlərinizi bilmək istəyərdim. Hansı komanda daha xoş təsir bağışlayır?
Mənim üçün yaxşı oyunu İspaniya millisi oynayır. Almaniya millisi də baxımlı futbol nümayiş etdirir.
– Turnirin favoritlərindən olan Hollandiya və İtaloiyanın zəif çıxışını nədə görürüsüz?
İtaliya normal nəticələr qazanır. Lakin Hollandiyanın göstərdiyi və qazandığı nəticələr sürpriz oldu. Danimarka ilə oynadıqları ilk matçda hollandların şansları var idi. Amma bəxtləri gətirmədi.
– Ümumiyyətlə, favoritiniz kimdir?
Təbii ki, İspaniya.
-Alan Zaqoev, Mandzukiç və Mario Qomez 3 qolla bombardirlik siyahısında liderdilər. Bunların performansını necə dəyərləndirirsiz?
Sadəcə Zaqoevi deyə bilərəm. Əla oynayır. Turnirin ən yaxşılarındandı. Bombardirliyə gəlincə, istənilən futbolçu ola bilər. Qarşıda hələ oyunlar var.
– Bu Avropa çempionatında Türkiyənin yeri göründü. Sizcə, milliniz bu turnirdə çıxış etsəydi, nəticə qazana bilərdi?
Bunu əvvəlcədən demək, əlbəttə ki, düz olmaz. Çünki gərək çıxış edəsən. Amma Türkiyə Avro-2012-də çıxış etsəydi, bu turnirə rəng qatardı. Bizim milli 2008-ci ildə mümkünsüzü bacararaq sona kimi getdi. Bur turnirdə necə olacağını isə deyə bilmirəm.
-Biraz da sabiq komandanız “Xəzər Lənkəran” haqda danışaq. Avropa Liqasına vəsiqə qazanan Cənub təmsilçisinin şanslarını və Ruslan Abışov transferini necə dəyərləndirərdiz?
İnşallah, qarşıdakı rəqibin kimliyindən asılı olmayaraq, “Xəzər Lənkəran” qələbələr qazanıb qrup mərhələsinə vəsiqə qazanar. Ruslan Abışovun transferi isə məncə, düzgün addım idi. Ruslan uğurlu bir transferdi və onun komandaya güc qatacağına inanıram.
-Bəs komandadan göndərilən futbolçular haqda nə deyərdiz?
Fikirimcə, Mureşanın komandadan göndərilməsi düzgün olmadı. Onun yoxluğu hiss edilə bilər. Lakin bu, baş məşqçinin fikiridi və onu dəstəkləməliyik.
Səxavət QURBANOV
