"Azarkeşlərdən üzr istəyirik. Oyun boyunca axıra qədər bizə dəstək oldular."
Korner.az-ın məlumatına görə, bu sözləri "Qəbələ" klubunun baş məşqçisi Dorinel Muntyanu deyib. Premyer Liqanın XIII turu çərçivəsində "Simurq"u qəbul edən "Qəbələ" doğma meydanda rəqibə boyun əyib – 2:3.
Oyundan sonra mətbuat konfransında iştirak edən Muntyanu bunları bildirib:
"Nəticəyə görə cavabdeh mənəm. Çünki start heyəti mən təyin edirəm. Müdafiədə səhvlərə yol verdik. Fərdi xətalar çox oldu. Düşünürəm ki, qələbəyə daha çox layiq idik. Yeganə günahkar mənəm, buna görə də bütün məsuliyyəti üzərimə götürürəm"
Təcrübəli mütəxəssis nitqinə bunları da əlavə edib:
"Abışov ilk hissədə səhvsiz oynadı. Əsas xətalar oyunun sonunda oldu. Rəqib səhvlərdən layiqincə istifadə edib bizi cəzalandırdı. Bundan sonra son 5 tura diqqət etməliyik. Liderlərdən çox uzaqlaşmamalıyıq."
