Gürcüstan prezidenti Mixail Saakaşvili ölkə idmançılarının 2012-ci il London Yay Olimpiya Oyunlarında göstərdikləri nəticədən razı qalıb.
Saakaşvili 1 qızıl, 3 gümüş, 3 bürünc medal əldə edən olimpiyaçılarla fəxr etdiyini bildirib.
O bildirib ki, əhali sayı ilə medal sayını müqayisə etdikdə, görmək olar ki, Gürcüstan dünyada ilk sıralarda yer alan ölkələrdəndir: “Biz “qızılgül inqilabı”nadək “bürünc dövrü”ndə idik. İndi isə “qızıl dövrü”ndəyik. Mən belə nailiyyətlə fəxr etməyə bilmərəm. Bu, bizim balaca ölkəmiz üçün çox gözəl nəticədir”.
Gürcüstan millisi üçün London olimpiadası qalmaqalsız da keçinməyib. Cüdoçu Betkil Şukvani öz məğlubiyyətində hakimləri və Milli Olimpiya Komitəsini günahlandırıb. Onun fikrincə, komitə hakimlikdən şikayət etməli idi. Şukvani Gənclər və İdman Nazirliyini də ona təzyiq göstərməkdə ittiham edib. Cüdoçu mehmanxanadakı otağına nazir müavini gələrkən, pəncərədən tullanaraq, qaçmaq məcburiyyətində qaldığını vurğulayıb. O, özünə qarşı qərəzli münasibəti müxalifəti dəstəkləməsi ilə əlaqələndirib.
Saakaşvili isə Şukvaninin addımına belə reaksiya verib: “Bizim qızıl, gümüş və bürünc medal sahiblərimizlə yanaşı, belə məlum olur ki, mehmanxana pəncərəsindən tullanma üzrə bir rekordçumuz da var. Lakin mehmanxana pəncərəsindən tullanma olimpiya növləri sırasında deyil. Belə insanlar da var”.
Qeyd edək ki, Mixail Saakaşvili ilk dəfə 2004-cü il yanvarın 25-də Gürcüstan prezidenti seçilib. Həmin il Afinada keçirilmiş olimpiadada qonşu ölkə 2 qızıl, 2 gümüş medala sahib olub. 2008-ci il Pekin Yay Olimpiya Oyunlarında 3 qızıl, 3 bürünc medal qeydə alınıb. London olimpiadasında isə medal əyarında aşağı göstərici olsa da, medal sayında artım baş verib. Gürcüstan olimpiadalar tarixində ilk qızıl medalını Saakaşvilinin hakimiyyətə gəlişindən sonra əldə edib. Həmin vaxtadək Atlanta-1996-da 2 bürünc, Sidney-2000-də 6 bürünc qazanmaq mümkün olmuşdu.
lent.az
