“Neftçi”nin futbolçusu Mirhüseyn Seyidovun klubun prezidenti Sadıq Sadıqovla qohum olması barədə xəbərlər bir neçə il əvvəldən yayılıb.
Korner.az-ın məlumatına görə, belə bir xəbərlər yayılıb ki, Hüseynov məhz bu qohumluğa görə “Neftçi”də çıxış edir və son zamanlar əsas heyətdə oynaması da bununla bağlıdı.
Lakin futbolçu bu məsələyə aydınlıq gətirib və qohumluq söhbətinə nöqtə qoyub: “Bəli, Sadıq Sadıqovla eyni bölgədənik. Ancaq inanın səmimiyyətimə ki, Sadıq müəllimlə tanışlığımız Bakıda olub. Daha da dəqiqləşdirsək, o, “Neftçi”yə prezident təyin olunandan sonra tanış olmuşuq və bilmişəm ki, naxçıvanlıdı. Aramızda heç bir qohumluq yoxdu. Bəzən mətbuatda bu tip şeyləri oxuyanda hirslənirdim, mənə pis təsir edirdi. Ancaq sonradan fikir verməməyə başladım. Düşündüm ki, bütün diqqətimiz öz oyunuma yönəltməliyəm və sübut etməliyəm ki, “Neftçi”də öz oyunuma görə oynayıram. Bir söz də deyim. Sadıq müəllim elə insandı ki, o heç vaxt qohumluğa, tanışlığa fikir vermir. O, hər zaman düzgünlüyün tərəfdarı olub. “Neftçi”də məndən başqa, Araz Abdullayev, Emin Mehdiyev, Cavid İmamverdiyev, Elvin Yunuszadə, Tərlan Quliyev kimi gənclər var ki, məhz Sadıq müəllimin prezidentliyi dövründə öz potensiallarını açıblar. Bir də unutmaq lazım deyil ki, heç bir prezident qohumu, tanışı, yerlisi olsa belə, həmin futbolçunu layiq olmadığı halda oynatmaz. Çünki o futbolçu zəif olsa bunu hər kəs görəcək, qınayacaq ki. Bu zaman isə söz götürən həmin prezident olacaq”.
rekord.az
