Mirabdulla Abbasov: “Çempionluq üçün böyük addım atdıq”
28.10.2018 , 20:25
“Çox sevindirici haldır. Bizim üçün vacib qələbə idi. Turnir cədvəlindən hər kəsin xəbəri var. Bu cəhətdən çox önəmli qələbə idi. Düşünürəm ki, komanda şəklində çox yaxşı oynadıq və nəticədə 3 xal qazandıq”.
Bu sözləri “Neftçi” hücumçusu Mirabdulla Abbasov Topaz Premyer Liqasının 9-cu turunda “Qarabağ”a 3:1 hesabı ilə qalib gəldikləri oyundan sonra jurnalistlərə açıqlamasında deyib. Oyunda bir qol vuran forvard qələbəni gözlənilməz hesab etməyib:
“Qələbə gözlənilməz olmadı. Sadəcə, oyuna yaxşı hazırlaşmışdıq. Məşqlərimiz yüksək səviyyədə keçirdi. “Qəbələ”yə məğlub olduğumuz oyundan sonra psixoloji cəhətdən bir az çətinlik vardı. Daha sonra bu oyuna yaxşı köklənib, layiqli qələbə qazandıq. Bugünkü qələbə çox vacib idi. Turnir cədvəlində “Qarabağ”dan hazırda 6 xal öndəyik. Onların ehtiyatda bir oyunu var. Çempionluq üçün böyük addım atdıq, ancaq qarşıda çox oyunlarımız var. Ola bilər biz, ya da onlar xal itirsin”.
23 yaşlı hücumçu milli komandaya çağırlamamağı ilə bağlı da danışıb: “Hər zaman demişəm ki, milli komandamızın baş məşqçisinin fikirlərinə hörmətlə yanaşıram. Dəvət gəlsə, çalışacağam ki, əlimdən gələni edim. Əlbəttə, yığmada oynamaq istəyərəm. Özümü hazır sayıram. Çağırmasalar da, hörmətlə yanaşıram. Yəqin ki, bildikləri var”.
