Sabah DÇ-2014-ün seçmə qrup mərhələsi çərçivəsində Berti Foqtsun rəhbərlik etdiyi milli komandamız səfərdə Portuqaliya yığmasının rəqibi olacaq.
Bəs Braqada, AXA stadionunda keçiriləcək qarşılaşmada millimizdən nə gözləmək olar? Ulduzlar toplusu Portuqaliya seçməsi bizə yad rəqib deyil. Belə ki, millimiz indiyə qədər Avropa çempionatının seçmə mərhələsi çərçivəsində iki dəfə Portuqaliya ilə eyni qrupda yer alıb.
Köhnə-təzə tanış
İlk görüş 1999-cu ilə təsadüf edir. Mart ayının 26-sı Portuqaliyanın Gimarayeş şəhərində baş tutan matçda yığmamız rüsvay olmuşdu – 0:7. Həmin ilin sentyabr ayında Bakıdakı qarşılaşmada isə yığmamız Fiqolu portuqalları büdrətməyə nail olmuşdu – 1:1. Bu həm də millimizin Portuqaliya yığmasından aldığı ilk və hələ ki son xaldı.
2006-cı il oktyabr ayının 7-də milli komandamız bu dəfə Ronaldolu Portuqaliya millisi önündə darmadağından qaçmağa müyəssər ola bilməmişdi. Portuda keçirilən oyun meydan sahiblərinin 3:0-lıq qələbəsi ilə bitmişdi.
2007-ci ildə AÇ-nin seçmə mərhləsinin cavab oyununda da millimiz nə rəqibindən xal ala bildi, nə də qol vurmağı bacardı. Bakıdakı qarşılaşma 0:2 hesabı ilə qonaqların xeyrinə nəticələndi.
Təxribatçı və hazırkı "snayper" – Ronaldo!
Milli komandamız 2007-ci il AÇ-nin seçmə mərhələsi çərçivəsində Portuqaliya millisi ilə Bakıdakı oyun yəqin ki, bir çoxlarının yaddaşından silinməyib. Portuqalların ulduz futbolçusu Kriştiano Ronaldo paytaxtımızda baş tutan oyunda Aslan Kərimovla mübarizədə yerdə qalmışdı. Daha doğrusu o zaman yığmamızın şərəfini qoruyan Kərimovla ikili mübarizədə “Real”ın futbolçusu simuliyasiya edərək hakimi aldatmış və matçın baş hakimi Aslanı meydandan qovmaqla millimizin işini bir az da çətinə salmışdı. Sabah Braqdada baş tutacaq oyunda bu kimi amillər diqqətdən qaçmamalıdır. Ronaldonun yaxşı futbolçu olduğu qədər də, yaxşı da aktyorluq bacarığı var.
Ronaldodan söz düşmüşkən… Madrid klubunun şərəfinidə qoruyan futbolçu hal-hazırda millinin heyətində yığmada ən çox oyun keçirən və qol vuran futbolçudur – 96 oyun, 36 qol.
Siftə gəldi, "müftə" olmayacaq
Artıq millimiz qrupda ilk matçına çıxdı və doğma azarkeşlər önündə qrupun favoritlərindən olan İsrail yığmasından bir xal qoparda bildi – 1:1. Qalır bu uğurun ardını Braqada gətirmək. Bunun üçün millimiz rəqibdən qoxrmamalı, sona kimi mübarizə apararaq səhvsiz oynamalıdır. Siftəni İsraillə oyunda bir xal qazanaraq edən millimizə heç kim Potuqaliyada "müftə" xal bağışlamayacaq. Qalır mənzərəsi ilə göz oxşayan arenada gözəl oyun nümayiş etdirərək, azarkeşləri sevindirmək.
Səxavət QURBANOV
