Milli üzvləri ilə görüş
30.08.2023 , 14:09
Azərbaycan Voleybol Federasiyasının (AVF) rəhbərliyi Avropa çempionatında çıxışını başa vuran qadın voleybolçulardan ibarət millimizlə görüşüb.
Korner.az xəbər verir ki, Voleybol Mərkəzində baş tutan görüşdə AVF-nin prezidenti Şahin Bağırov, vitse-prezidentlər Faiq Qarayev və Bəhruz Quliyev, baş katib Faiq Orucov, İdarə heyetinin üzvləri, eləcə də millimizin hazırda Bakıda olan oyunçuları və texniki heyəti iştirak edib.
Ş.Bağırov qeyd edib ki, voleybolçularımız Avropa çempionatında arzulanan nəticəni əldə edə bilməsələr də sonadək mübarizə apardılar. O, idmançılarımızın uğurlu çıxış üçün əllərindən gələni etdiklərini vurğulayıb və onlara təşəkkürünü bildirib. Federasiya rəhbəri voleybolçularımıza ruhdan düşməməyi, bundan sonrakı yarışlara köklənməyi tövsiyə edib.
Ölkədə voleybolun inkişafı istiqamətində həyata keçirilən tədbirlərdən və nəzərdə tutulan planlardan danışan Ş.Bağırov onu da bildirib ki, federasiya həm qız, həm də oğlan voleybolçuların yetişdirilməsi ilə bağlı işlər görür. Artıq bu məqsədlə bir sıra seleksiya xarakterli tədbirlər həyata keçirilib, düşərgələr təşkil edilib. Həmçinin bölgələrdə voleybola marağın artırılması və uşaqların bu idman növünə cəlb edilməsi üçün regional klublar, mərkəzlər yaradılır. Qeyd edilib ki, bütün bu işlərin məqsədi seçilən uşaqların professional voleybolçu kimi yetişdirilməsi və onların gələcəkdə milli komandalarımızın heyətində çıxış etməsidir.
Görüşdə bildirilib ki, bəzi oyunçularımız artıq klub mövsümünə hazırlıq məqsədilə çıxış edəcəkləri komandaların bazasına yollanıblar, bəziləri isə bir müddət sonra klublarına qoşulacaqlar. Federasiya rəhbərliyi həm xarici çempionatlarda, həm də ölkə birinciliyində mübarizə aparacaq voleybolçularımıza ugurlar arzulayıb.
Daha sonra millimizin üzvləri və AVF rəhbərliyi Avropa çempionatındakı çıxışımızla bağlı fikir mübadiləsi aparılıblar.
