London Yay Olimpiya Oyunlarına hazırlaşan sərbəst güləş üzrə Azərbaycan yığma komandası mayın 22-dən etibarən Qəbələdə təlim-məşq toplanışına başlayıb.
Korner.az-ın Azərbaycan Güləş Federasiyasının saytına istinadən yaydığı xəbərə görə, baş məşqçi Saypulla Absaidov və böyük məşqçı Firdovsi Umudovun rəhbərliyi altında Qəbələyə ümumilikdə 14 pəhləvanımız yollanıb. İyunun 9-dək davam edəcək təlim-məşq toplanışında London Olimpiadasına vəsiqə qazanmış güləşçilərimiz, eləcə də hər an onları əvəzləməyə qadir olan idmançılarımız iştirak edirlər.
Belə ki, olimpiadada təmsil olunacağımız çəkilərdə uğurla çıxış etmək üçün Toğrul Əsgərov və Hacı Əliyev (60 kq), Cəbrayıl Həsənov, Ruslan Dibirhacıyev və Ağahüseyn Mustafayev (66 kq), Əşrəf Əliyev və Aleksandr Qostiyev (74 kq), Şərif Şərifov və Məhəmmədhacı Xatiyev (84 kq), Xetaq Qazyumov, Hacı Əlicanov və Hacı Şərifov (96 kq), Cəmaləddin Məhəmmədov və Əli Maqomedabirov 20 gün ərzində xüsusi proqram əsasında Qəbələdə hazırlıq keçəcəklər.
