“Milan”ın futbolçusu əməliyyat olundu – 8 həftə oynamayacaq
24.02.2026 , 09:00
“Milan” yarımmüdafiəçisi Ruben Loftus-Çikin uzunmüddətli zədə aldığını açıqlayıb.
Korner.az xəbər verir ki, Seria A-nın 26-cı turunda “Parma” ilə keçirilən və 0:1 hesabı ilə başa çatan görüşün 8-ci dəqiqəsində insident yaşanıb.
Cərimə meydançasına ötürmə zamanı “Parma”nın qapıçısı Edoardo Corvi ilə toqquşan ingiltərəli futbolçu yerə yıxılıb. Onun boynu sabitlənərək xərəkdə meydandan çıxarılıb.
Müayinələr nəticəsində Loftus-Çikdə alveolyar çıxıntının sınığı müəyyən edilib. Klubun açıqlamasına əsasən, futbolçu əməliyyat olunub və cərrahi müdaxilə uğurla başa çatıb. O, artıq xəstəxanadan buraxılıb və özünü yaxşı hiss edir.
Yarımmüdafiəçinin təxminən 8 həftə yaşıl meydanlardan kənarda qalacağı bildirilir.
