“Milan” Divok Origi ilə yollarını ayırmağa yaxındır
10.10.2025 , 12:13
“Milan” belçikalı hücumçu Divok Origi ilə yollarını ayırmağa hazırlaşır.
Korner.az xəbər verir ki, tərəflər müqavilənin vaxtından əvvəl ləğvi ilə bağlı danışıqların son mərhələsindədir və yalnız bir neçə hüquqi məsələ üzərində razılaşma qalır.
Razılaşmanın 2026-cı ilin yanvarına qədər rəsmiləşdirilməsi planlaşdırılır.
Origi “Milan”a 2022-ci ildə “Liverpul”dan transfer olunub və klubla 4 illik müqavilə imzalayıb. Onun illik maaşı 4 milyon avrodur ki, bu məbləğ komandanın bəzi aparıcı futbolçularından – Luka Modriç və Adrien Rabyodan (3,5 milyon avro) daha çoxdur.
Belçikalı hücumçu “Milan” forması ilə son dəfə 2023-cü il mayın 28-də A Seriyasının “Yuventus”la oyununda meydana çıxıb və həmin matçda cəmi 4 dəqiqə oynayıb.
Klub yayda 31 yaşlı futbolçu ilə yolları ayırmağa cəhd etsə də, tərəflər razılığa gələ bilməmişdi. Lakin son günlər danışıqlar intensivləşib və yaxın zamanda müqavilənin ləğvi rəsmiləşəcək.
