PSJ-nin sabiq futbolçusu: “Messinin az əhəmiyyət kəsb edən oyunlarda verdiyi ötürmələr kimə lazımdır?”
27.04.2023 , 10:02
PSJ-nin keçmiş futbolçusu Jerom Roten argentinalı hücumçu Lionel Messini maaşının artırılmasını tələb etdiyinə görə tənqid edib.
Korner.az xəbər verir ki, o, Messinin Paris təmsilçisinə məhz daha çox pul qazanmaq üçün keçdiyini deyib.
“Biz onun “Barselona”dan niyə ayrıldığını çox yaxşı bilirik. Katalonlar onun maddi tələblərini qarşılaya bilmirdilər. Onun 15 və ya 20 məhsuldar ötürmə verməsi məni maraqlandırmır. Onun vacib oyunlarda deyil, daha az əhəmiyyət kəsb edən oyunlarda verdiyi ötürmələr kimə lazımdır? Çempionlar Liqasının qrup mərhələsində “Benfika”ya qarşı çətin olanda və PSJ heç bir oyunda qalib gələ bilməyəndə biz böyük Messini və onun möhtəşəm oyununu görmədik. “Bavariya” ilə matçda da dahi Messini görmədik”, – deyə Roten bildirib.
Messi bu mövsüm bütün turnirlərdə 36 oyuna çıxıb, 20 qol vurub, 19 məhsuldar ötürmə edib.
