Meksika millisinin yeni baş məşqçisi məlum oldu
11.12.2025 , 10:34
“Barselona”nın sabiq futbolçusu Rafael Markes DÇ-2026-dan sonra Meksika millisinin baş məşqçisi olacaq.
Korner.az xəbər verir ki, bunu Meksika Futbol Federasiyasının prezidenti İvan Sisnieqa təsdiqləyib.
Onun sözlərinə görə, Markesin müqaviləsində dünya çempionatından sonra milli komandanın sükanı arxasına keçəcəyi və hazırkı baş məşqçi Xavyer Aqirreni əvəz edəcəyi qeyd olunub.
2024-cü ildən Meksika yığmasında məşqçi kimi çalışan Markes, qarşıdan gələn mundialdan sonra rəsmi şəkildə daha yüksək vəzifəyə sahiblənəcək.
Qeyd edək ki, DÇ-2026 Meksikanın da ev sahibliyi etdiyi turnirdir və yarış Kanada və ABŞ ilə birgə keçiriləcək. Rafael Markes futbolçu kimi beş dünya çempionatında çıxış edərək, bu göstəricini Lionel Messi və Kriştiano Ronaldo da daxil olmaqla bir neçə ulduzla paylaşır.
