Mariya Stadnik doqquzqat Avropa çempionu oldu
20.04.2023 , 20:43
Bu gün Azərbaycanın daha beş qadın güləşçisi Xorvatiyanın paytaxtı Zaqrebdə keçirilən Avropa çempionatında mübarizəyə qoşulub.
Korner.az xəbər verir ki, 53 kq çəki dərəcəsində çıxış edən Türkan Nəsirova yarımfinalda isveçli Emma Malmqrenə “tuş”la məğlub olub və sabah bürünc medal uğrunda güləşəcək.
57 kq-da Jalə Əliyeva 1/4 finalda almaniyalı Elena Brüggerə 6:3 hesabıyla qalib gələrək yarımfinala yüksəlib. Güləşçimiz yarımfinalda polşalı rəqibi Yovita Vrjeşenə 5:0 hesabı ilə qalib gələrək, finala adını yazdırıb.
62 kq-da Birgül Soltanova (62 kq) təsnifat mərhələsində estoniyalı Viktoriya Vessoya məğlub olub.
65 kq-da Elis Manolova mübarizəyə 1/4 finaldan qoşulub və rumıniyalı İrina Rinqaciyə “tuş”la uduzub. Rəqib finala yüksəldiyi üçün Elis təsəlliverici görüşdə iştirak hüququ qazanıb. O, fransalı Kendra Daçerlə qarşılaşacaq.
Nigar Mirzəzadə (72 kq) təsnifat mərhələsində ukraynalı Lyudmila Tiçinaya müqavimət göstərə bilməyib – 0:10.
Bu çəkilərdə təsəlliverici və medal görüşləri aprelin 21-də keçiriləcək.
Bu gün, həmçinin, digər üç qadın güləşçi medal görüşündə qüvvəsini sınayıb.
50 kq-da səkkizqat qitə çempionu Mariya Stadnik finalda Oksana Livaçla (Ukrayna) qarşılaşıb. Rəqibini 9:4 hesabı ilə məğlub edən Stadnik doqquzqat Avropa çempionu olub.
55 kq-da Elnurə Məmmədova və 59 kq-da Alyona Kolesnik bürünc medal qarşılaşmasına çıxacaqlar. Onlar müvafiq olaraq Katarjina Kravçik (Polşa) və Sandra Paruşevski (Almaniya) ilə güləşəcəklər.
Öncədən sərbəst güləşçilər Avropa çempionatını 6 medalla başa vurublar və komanda hesabında da çempion olublar. Yarış aprelin 23-də yekunlaşacaq.
