Bakıda keçirilən 42-ci Ümumdünya Şahmat Olimpiadasının geridə qalan müddətdə əsas sensasiyası qadınların yarışında, IV turda baş tutub.
Korner.az-ın məlumatına görə, latviyalı şahmatçı Dana Reyznietsa-Ozola Çin yığmasının lideri, dünya çempionu Hou Yifanı məğlub edib. Ümumi nəticədə Çin yığması Latviyanı 2,5:1,5 hesabı ilə məğıub etsə də, Reyznietsa-Ozolanın qələbəsi böyük rezonans doğurub. Bakı Şahmat Olimpiadasında mübarizə aparan Dana Reyznietsa-Ozola Latviyanın maliyyə naziridir.
Kristal Zalının mətbuat zalında əcnəbi və yerli jurnalistlər üçün mətbuat konfransı təşkil edən latviyalı şahmatçı qələbəsini belə şərh edib:
“Dünya çempionu üzərində qələbə mənim üçün bayramdır. Latviyadan xeyli təbrik zəngi gəldi. Təəssüratlarım çox yaxşıdır. Hər halda, şahmat kraliçasını məğlub etmək insana hər gün qismət olmur. Təkcə nəticədən yox, həm də oyundan razıyam. Hər partiya kiçik həyatdır
Hər şey asandır. Balansı qorumaq mümkündür. İşimdə xeyli enerji sərf edirəm. Birinci lövhədə mübarizə aparmağım lider olduğum göstəricisidir. Reytinqə görə yarış iştirakçıları arasında iyirminci yeri tuturuq. Bakıya gəlməmişdən öncə təlim-məşq toplanışında olduq. Həm nəzəri, həm də praktiki məşğələlər keçdik. Bir ailə kimi yarışa hazırlaşmışıq
Şahmat oynamağı bacarmaq istənilən sahədə insana fayda verir. Əsasən də siyasətdə. Çünki siyasətə bir neçə gedişi əvvəldən görməlisən. 4 övlada sahibəm. Böyük qızımın 13 yaşı var. Amma o, daha çox futbol və basketbolla məşğul olur”.
Layihə AFFA yanında Media Komitəsi tərəfindən maliyyələşdirilir
