"Sabah bizi çətin oyun gözləyir. Amma biz öz azarkeşlərimiz qarşısında oynayırıq. Buna görə də qələbə qazanmalıyıq. Qələbə qazanmaq üçün əlimizdən gələni edəcəyik. Əgər İsraili məğlub edə bilsək, Portuqaliyaya da yaxşı əhval-ruhiyyədə yollanacağıq”.
Korner.az-ın məlumatına görə, bu sözləri Azərbaycan milli komandasının futbolçusu Mahir Şükürov deyib. Müdafiəçi DÇ-2014-ün seçmə mərhələsi çərçivəsində İsrailə oyunöncəsi keçirilən mətbuat konfransında "həm sabahkı oyun, həm də, "Neftçi"nin Avropa Liqasındakı uğurundan danışdı:
“Mənə qarşı Yossi Benayun oynayacaq. Buna baxmayaraq, oyuna maksimum köklənməyə çalışıram. Özümü yaxşı tərəfdən göstərmək istəyirəm. Ümid edirəm ki, Belçika və Qazaxıstanla oyunlarda olduğu kimi, yenə qol ötürməsi verə biləcəyəm.
Bütün gücümlə çalışacam ki, “Neftçi”də nə qədər faydalı idimsə, millidə də elə oynayım. Fikrimcə, “Neftçi”də məndən başqa Mirhüseyn Seyidov, Araz Abdullayev və Cavid İmamverdiyev də yığmaya kömək edə bilərdilər. Məsələn elə İsraillə oyunda. Rəşad Sadiqov barədə isə danışmağa dəyməz. Əlbəttə, o da yığmaya çox kömək edə bilərdi. Amma Berti Foqtsa bunu mən deyə bilmərəm. Bu, onun öz qərarıdı. Hər halda bu komanda APOEL kimi rəqibi məğlub edibsə, deməli, onun üzvləri də yığmaya kömək edə bilərdi”.
