Türkiyənin Kocaeli şəhərinin inzibati vahidliyinə aid Kartəpə qəsəbəsində məskunlaşan "Simurq" klubu növbəti mövsümə hazırlıqları davam etdirir.
Korner.az-ın klubun rəsmi saytına istinadən verdiyi məlumata görə, gündə iki dəfə olmaqla məşq edən komanda əsasən fiziki hazırlıqlı tapşırıqlar üzərində işləyirlər.
Baş məşqçi Georgi Çixradze futbolçularının fiziki durumunun yüksəltməklə yanaşı, baxışda olan yerli və legioner futbolçuları da nəzərdən keçirir.
Xəbər verdiyimiz kimi "Simurq" buradakı təlim-məşq prosesi çərçivəsində 3 yoldaşlıq görüşü keçirəcək. Artıq "sarı-qaralar"ın iki rəqibi məlumdur. Zaqatala təmsilçisi iyunun 29-da "Kocaelispor"la, iyulun 2-də isə "Spartak" (Nalçiklə) qarşılaşacaq.
Qeyd edək ki, komandanın düşərgəsinə baxış üçün daha 2 yeni legioner futbolçu qatılıb. Bunlar macarıstanlı müdafiəçi Kratsl Karol və albaniyalı hücumçu Vilfor Xisadır. Futbolçularla bağlı son qərarı yoldaşlıq görüşlərindən sonra baş məşqçi Georgi Çixradze verəcək.
