Afrika Futbol Konfederasiyası (AFK) Mərakeş Futbol Federiyasına (MFF) ağır cəza tətbiq edib.
Korner.az-ın Qol.Az-a istinadən verdiyi xəbərə görə, buna Mərakeşin Afrika kubokuna ev sahibliyindən imtinası səbəb olub.
Qeyd edək ki, bir neçə gün əvvəl başa çatan Afrika Millətlər kubokunun Mərakeşdə keçirilməsi nəzərdə tutulmuşdu. Lakin “qara qitə”də Ebola virusunun sürətlə yayılmasını əsas gətirən Mərakeş yarışın başlamasına bir neçə ay qalmış ev sahibliyindən imtina etmişdi. Afrika Futbol Konfederasiyası Mərakeşi qərarından daşındırmağa çalışsa da, buna nail ola bilməmişdi. Nəticədə turnirin Ekvatorial Qvineyada keçirilməsinə qərar verilmişdi.
Mərakeşin ev sahibi olduğu nüfuzlu yarışı qəbul etməkdən boyun qaçırması səbəbindən bu ölkənin 2017 və 2019-ci illərdə keçiriləcək Akfrika Millətlər kubokunda iştirakına qadağan qoyulub. Bundan başqa, federasiya təqribən 883 min avro məbləğində cərimələnib. Mərakeşin turnirə ev sahibliyindən imtinasından sonra Afrika Futbol Konfederasiyasına dəymiş zərərə görə isə bu ölkənin təqribən 8 milyon 50 min avroluq təzminat ödəməsi haqda qərar çıxarılıb.
Mərakeş Futbol Federiyası isə AFK-ın cəzalarına etiraz edib. Qurumdan bildirilib ki, öz haqlarını qorumaq üçün sonadək mübarizə aparacaqlar.
