“Yuventus”un yeni transferi Qonzalo İquain onu artıq çəkidən əziyyət çəkdiyinə görə qınayanlara cavab verib.
Korner.az-ın məlumatına görə, “Napoli”dən 94 milyon avroya transfer olunan argentinalı hücumçu çəkisinin artıq olmasına rəğmən yaxşı formada olduğunu deyib:
“İnsanların bu mövzu haqda bu qədər danışmaqlarını anlamıram. 20 günə qədər intensiv məşq etmişəm. İndi yaxşı formadayam. Qoy, mənə gombul desinlər. Mən də qollarımı sıralayacam”.
İquain İtaliya A Seriyasında yeni mövsümün ilk turunda “Fiorentina” ilə oyunda meydana daxil olduqdan 9 dəqiqə sonra komandasının qələbə qolunu vurub.
