Premyer Liqanın 2-ci turunda "Qəbələ" mövsümün ilk ev oyununda paytaxt təmsilçisi “İnter”i minimal hesabla (1:0) məğlub etdi.
Korner.az-ın məlumatına görə, komandaya 3 xalı gətirən yeganə qola "Qəbələ"də ikinci oyununu keçirən Lorival Assis imza atdı. Qısa müddətdə heyətə uyğunlaşan braziliyalı matç sonrası klubun rəsmi saytına açıqlamasında qol vuracağını öncədən hiss etdiyini deyib:
"Özümü çox xoşbəxt hiss edirəm. Gərgin və maraqlı oyun keçdi. "İnter"in güclü komanda olduğunu bilirdik. Ona görə də matça ciddi hazırlaşmışdıq. Hazırlığımızın nəticəsini də gördük. Sevinirəm ki, "Qəbələ"də qol hesabımı açdım. Düzün desəm, əvvəlcədən qol vuracağımı hiss etmişdim. "Qəbələ"yə gəlməkdə məqsədim qollarımla komandanın uğurlarında pay sahibi olmaq, gözəl nəticələrlə klubun tarixinə düşməkdir".
