2012-ci il London Yay Olimpiya Oyunlarının Təşkilat Komitəsi (LOGOC) Azərbaycan nümayəndə heyətindən rəsmi qaydada üzr istəyib. Bu haqda Lent.az-a London olimpiadasında Azərbaycanın şef de-missionu İlham Mədətov məlumat verib.
İ.Mədətovun sözlərinə görə, LOGOC Rusiya olimpiya yığmasında yer alan erməni əsilli boksçu David Ayrapetyanın doğum yeri Bakı şəhərinin səhvən Rusiya ərazisi kimi göstərildiyini anlayıb. Bununla əlaqədar Azərbaycan nümayəndə heyətinə məktub göndərən Təşkilat Komitəsi üzrxahlığını çatdırıb. Eyni zamanda “www.london2012.com” saytındakı yanlışlıq aradan qaldırılıb. Yəni, Ayrapetyanın doğulduğu yerin qarşısındakı “Bakı” sözü saxlanılıb, “Rusiya” isə götürülüb.
Qeyd edək ki, 49 kq çəki dərəcəsində çıxış edən David Ayrapetyan 26 sentyabr 1983-cü ildə Bakıda doğulub. O, Ermənistanla Azərbaycan arasındakı münaqişənin başladığı illərdə Rusiyaya köçüb. London olimpiadasının rəsmi saytında Rusiya yığmasının güləşçiləri Besik Kuduxov və Denis Tsarquş, eləcə də Ukrayna, Belarus, Qazaxıstan ərazilərində doğulmuş idmançılarla bağlı məlumatlardakı yanlışlıq da aradan qaldırılıb. İndi hər bir idmançının doğum yeri qarşısında, sadəcə, anadan olduğu şəhər yazılıb.
