Bu gün XXX London Yay Olimpiadasında Azərbaycan ilk qızıl medalını qazanıb. Korner.az-ın məlumatına görə, sərbəst güləş üzrə idmançımız Toğrul Əsgərov hələki ölkəmizə yeganə qızılı medal qazandıran güləşçi olub. 60 kq çəki dərəcəsində mübarizə aparan Əsgərov mübarizəyə 1/8 final mərhələsindən qoşulub. İdmançımız bu mərhələdə almaniyalı Tim Şleyçerlə qarşılaşıb və hər iki hissədə qalib gələrək növbəti mərhələyə adlayıb.
1/4 finalda yapon Kenişi Yumoto ilə üz-üzə gələn Toğrul bu görüşdə də, qalib gələrək yarımfinala adını yazıdırıb. Yarımfinalda Əsgərovun rəqibi ABŞ idmançısı Koleman Skott olub. Toğrul birinci hissədə 1:0, ikinci hissədə 5:0 hesabı ilə qalib gələrək finala adlayıb. Əsgərovun həlledici görüşdəki rəqibi isə Besik Kudukov (Rusiya) olub. Toğrul Əsgərov hər iki hissədə inamlı qələbə qazanaraq (1:0, 5:0) olimpiya çempionu olub.
Digər təmsilçimiz Şərif Şərifov (84 kq) da yarışa 1/8 finaldan qatılıb. Əvvəlcə bu mərhələdə Türkiyə güləşçisi İbrahim Bölükbaşını məğlub edən idmançımız daha sonra amerikalı Ceyk Hebberti yenib. Yarımfinalda Şərif Şərifovun rəqibi Ehsan Laşgari (İran) olub. Şərif rəqibinə qalib gələrək (1:0, 0:2, 2:1) finala çıxıb.
Şərifovun finaldakı rəqibi isə Puerto Rikonu təsmil edən Yusept Espinal olacaq. Görüş saat 23.21-də start götürəcək.
