Bu gün XXX London Olimpiadasında güləş yarışlarına start verilib. Korner.az-ın məlumatına görə, ilk olaraq yunan-Roma güləşçiləri mübarizəyə qoşulub.
55 kq-da ölkəmizi bu yarışda təmsil edən Rövşən Bayramov 1/16 finalda rusiyalı Minqiyan Semenovu, 1/8 finalda amerikalı Tomas Manqonu, 1/4 finalda isə Çin güləşçisi Li Şujini məğlub edən idmançımız finala vəsiqə qazanmaq üçün Cənubi Koreyanı təmsil edən Ço Qyujini məğlub etməli idi. Rövşən birinci hissədə bir, ikinci hissədə isə iki xal qazanarq finala vəsiqə qazanıb. Finalda Rövşənin rəqibi İran güləşçisi Həmid Soryan olub. Lakin idmançımız finalda məğlub olaraq, gümüş medalla kifayətlənib.
74 kq-da isə ölkəmizi Emin Əhmədov təmsil edir. İdmançımız mübarizəyə 1/8 finaldan qoşulub. E.Əhmədov ilk görüşündə, Xorvatiya təmsilçisi Neven Zugajı məğlub edərək, 1/4 finala yüksəlib. Bu mərhələdə isə Eminin rəqibi gürcüstanlı Zurabi Datunaşvili olub. Bu görüşdə də, qalib gələn idmançımız yarımfinalda erməni idmançısı Arsen Julfalakyanla qarşılaşıb. Lakin güləşçimiz uğurun davamını gətirə bilməyib və rəqibinə 0:3 hesabı ilə məğlub olub.
Bununla belə, Eminin bürünc medal qazanmaq şansında yaxşı istifadə edib. Əhmədov Belarusu təmsil edən Aleksandr Kikinyovla çətin mübarizədən qalib ayrılıb və bürünc medal qazanıb.
Qeyd edək ki, millimiz London olimpiadasında 5 yunan-roma güləşçi ilə təmsil olunur.
