.jpg)
“Xəzər Lənkəran” rəhbərliyi mövsüm ərzində komandaya göstərdikləri dəstəyə görə azarkeşlərə təşəkkürünü bildirib. Korner.az-ın məlumatına görə, cənub təmsilçisinin azarkeşləri hər mövsüm olduğu kimi, 2011/2012 mövsümündə də ölkə üzrə ev oyunlarına gələn tamaşaçı sayında lider olaraq qalır.
Bu mövsüm komanda ümumilikdə 19 ev oyunu keçirib ki, bunlardan 16-sı Premyer Liqa çərçivəsində, 2-si Azərbaycan Kubokunda və 1 matç Avroliqanın təsnifat mərhələsində baş tutub.
Ümumilikdə, rəsmi statistikaya əsasən cənub təmsilçisinin ev oyunlarını 146200 nəfər azarkeş izləyib. Premyer Liqada ev oyunlarına gələnlərin sayı 123000, kubokda 8200, Avroliqada 15000 nəfər təşkil edib. Komandanın hər ev oyununu orta hesabla 7695 nəfər azarkeş izləyib. Ən çox azarkeş sayı isə Avroliqanın təsnifat mərhələsi çərçivəsində İsrailin “Makkabi” (Tel-Əviv) klubuna qarşı keçirilmiş matçda qeydə alınıb – 15000.
Bu da nəzərə alınmalıdır ki, bu mövsüm “Xəzər Lənkəran” Premyer Liqa çərçivəsində iki ev oyununu tamaşaçısız keçirməli olub, Azərbaycan kubokunun 1/8 final mərhələsində “Qaradağ-Lökbatan”a qarşı oyun isə Suraxanı qəsəbəsində baş tutmuşdu.
Başa çatan mövsüm daha bir əlamətdar hadisə ilə yadda qalıb. Belə ki, Premyer Liqanın 29-cu turunda “Neftçi”yə qarşı Lənkəranda keçirilmiş oyunda (1:0) “Xəzər Lənkəran”ın azarkeşlərinin Lənkəran şəhər mərkəzi stadionunda baş tutan görüşlərdə ümumi sayı 1 milyon göstəricisini aşmışdı.
Həmçinin mövsümün son üç ev oyunu “Xəzər Lənkəran”ın rəsmi saytı vasitəsilə Lənkərandan kənarda yaşayan azarkeşlərin diqqətinə çatdırılıb. Həmin matçlardan hər birini orta hesabla təxminən 1000 nəfər azarkeş izləmişdir ki, bu da ölkədə canlı internet yayımına eyni zamanda qoşulma baxımından ən yüksək göstəricidir.
