"Xəzər Lənkəran" və "Bakı"nın sabiq baş məşqçisi Cüneyt Biçər ötən gün Avropa Liqasında mübarizə aparan klublarımızın oyunlarını Korner.az-a dəyərləndirdi
-Cüneyt bəy, klublarmızın Avroliqadakı oyunlarının nəticələrindən xəbəriniz varmı?
Bəli. Oyunlara baxa bilməsəm də, nəticələrdən xəbərim var. Qeyri-adi nəsə baş vermədi.
– Bu nəticələri gözləyirdiniz?
Hesab olaraq yox, amma oyun olaraq belə nəticələrin qeydə alınacağını bilirdim.
– Sabiq komandalarınız "Bakı" və "Xəzər Lənkəran" qələbə qazana bilmədi…
Əslində, belə nəticələri gözləməyə dəyərdi. Hələ Lənkərandakı oyunun nəticəsi məni təəccübləndirmədi. Çünki komandada iş yaxşı qurulmalıdı. Hər iki komandanın rəqibləri zəif deyildi. Ancaq qələbə qazana bilərdilər. Ümumiyyətlə, hər kəs səbirli olmalıdı. İstər jurnalist, istərsə də klub nümayindələri.
– Amma "Bakı"nın rəqibi peşəkar komanda deyildi. Hətta onlara formanı "Bakı" klubu vermişdi.
Belə şeylər olur futbolda. Bunlar elə də şişirdilməməlidi. Həvəskar komanda olsa da, oyun meydanda qazanılır. Rəqibin kim olur-olsun, sən onu meydanda məğlub etməyə çalışmalısan. Düzdür, siz dediyinizdə həqiqət var. Ancaq rəqibin nə etməsi deyil, sənin meydanda necə oynayacağın önəmlidir.
– "İnter" isə səfərdə 5:0 hesablı qələbə qazandı…
Bax, bu klub düzgün yoldadı. 3 ildir eyni baş məşqçi ilə yola davam edirlər və nəticəsi isə avrokuboklarda özünü göstərir. Eyni tipli futbolçular və əsas məsələ heyəti saxlamalarıdı. Transfer siyasətində düzgün yol seçiblər və bu onlara uğur gətirəcək.
– Cavab qarşılaşmalarında komandalarımızın şansların necə dəyərləndirirsiz?
"İnter" işinin öhdəsindən gəlib. "Xəzər Lənkəran" üçün qazanılan nəticə təbii ki, kritikdi. Əgər rəqib Lənkəranda iki qol vura bilibsə, deməli, qol vurmağı bacara bilən güclü komandadır. "Bakı"ya gəlincə, məncə, onlar bu mərhələni keçə bilərlər.
Səxavət QURBANOV
