Bu gün Azərbaycan Premyer Liqasında II dövrəyə yekun vurulacaq.
Korner.az-ın məlumatına görə, 18-ci turun bütün görüşləri eyni gündə baş tutacaq.
Bununla da, Premyer Liqada fasiləyə yaranacaq. Son turda evdə "Qarabağ"a 2:3 hesabı ilə məğlub olan "Xəzər Lənkəran" bu gün öz meydanında AZAL-ı qəbul edəcək. Oyun saat 15:00-da başlayacaq.
Turun mərkəzi qarşılaşması Qəbələdə keçiriləcək. Burada yerli "Qəbələ" klubu "İnter"i sınağa çəkəcək. "İnter" bu görüşdə qələbə qazanmaqla ikinci pillədəki mövqeyini bir qədər də möhkəmləndirəcək. "Qəbələ" isə "İnter"ə qalib gəlməklə turnir cədvəlinin 4-cü pilləsinə yüksələ bilər. Lakin bunun üçün digər oyunlarda "Xəzər Lənkəran" və "Simurq" xal itkisi ilə üzləşməlidir. Bu görüşün də start fiti saat 15:00-da veriləcək.
Premyer Liqanın hazırkı lideri "Qarabağ" klubu öz meydanında "Sumqayıt"la münasibətlərinə aydınlıq gətirəcək. Qurban Qurbanovun komandası bu oyunda ən azı bir xal qazanacağı təqdirdə qış fasiləsinə lider mövqeyində yollanacaq. Tofiq Bəhramov adına Respublika stadionunda keçiriləcək oyun saat 15:30-da başlayacaq.
Tura Zaqatalada keçiriləcək "Simurq" – "Bakı" oyunu ilə yekun vurulacaq. Hazırda 10 xalla turnir cədvəlinin sonuncu pilləsində qərarlaşan "Bakı" klubu bu görüşdən 3 xalla ayrılmaqla vəziyyətini bir qədər yaxşılaşdırmağa çalışacaq. Lakin Georgi Çixradzenin komandasının buna nə dərəcədə imkan verəcəyi maraq doğurur. Bu matçın start fiti saat 17:00-da veriləcək.
21 dekabr (bazar)
Azərbaycan Premyer Liqası, 18-ci tur
15:00. “Qəbələ” – “İnter” 1:1
Hakimlər: Fariz Yusifov, Munis Abdullayev, Elşən Acalov, Vüsal V. Əliyev
Qəbələ şəhər stadionu.
QOL: Dodo, 38 / Məhəmməd Mirzəbəyov, 67
15:00. “Xəzər Lənkəran” – AZAL 1:1
Hakimlər: Əliyar Ağayev, Rza Məmmədov, Akif Əmirəli, Rəhim Həsənov
“Xəzər Lənkəran” mərkəzi stadionu.
QOL: Fernando Qabriyel, 60 / Mombonqo, 43
15:30. “Qarabağ” – “Sumqayıt” 2:0
Hakimlər: İnqilab Məmmədov, Yaşar Abbasov, Nahid Əliyev, Orxan Məmmədov
Bakı. Tofiq Bəhramov adına Respublika stadionu.
QOL: Leroy Corc, 25, Vurğun Hüseynov, 56
17:00. “Simurq” – “Bakı”
Hakimlər: Ömər Paşayev, Azər Əsgərov, Mübariz Haşımov, Ramil Diniyev
Zaqatala şəhər stadionu.
