17 yaşadək futbolçu qızlar arasında dünya çempionatının Lənkəran şəhər mərkəzi stadionunda təşkili nəzərdə tutulan ¼ final matçının Bakıya keçirilməsinin səbəbi müəyyənləşib. Bu haqda Yerli Təşkilat Komitəsinin media və kommunikasiya şöbəsinin direktoru Emin Nəbiyev məlumat verib.
O bildirib ki, ot örtüyünün pis vəziyyətə düşməsi Lənkəran stadionundan imtina ilə nəticələnib: “Hələ çempionat öncəsi FİFA və Yerli Təşkilat Komitəsi Lənkəran şəhər mərkəzi stadionunun ot örtüyündən narahatlıqlarını bildirmişdilər. Bu məqsədlə mütəxəssislər tərəfindən stadiona bir neçə dəfə baxış keçirilmiş, müəyyən tövsiyələr verilmişdi. Təəssüf ki, stadion rəhbərliyi Təşkilat Komitəsindən xəbərsiz, özbaşına təmirə başlayıblar. Nəticədə ot örtüyü pis vəziyyətə düşüb. Ona görə də Təşkilat Komitəsi Lənkəran stadionunda keçirilməsi nəzərdə tutulan ¼ final qarşılaşmasının Bakıdakı 8-ci km stadionunda oynanılmasına qərar verib”.
Bu qərardan sonra ¼ final və yarımfinal mərhələsinin bütün oyunlarının məhz təbii ot örtüklü 8-ci km stadionunda keçiriləcəyi məlum olub. ¼ final görüşləri hər gün 2-si olmaqla, 2 gün ərzində – oktyabrın 4-də və 5-də, yarımfinal görüşləri oktyabrın 9-da baş tutacaq. Nəbiyevin sözlərinə görə, 8-ci km stadionu bu qədər matçı qəbul etmək iqtidarındadır: “Stadiona nəzarət edən ingiltərəli mütəxəssislər bizə bildiriblər ki, heç bir problem olmayacaq”.
Öz növbəsində Lənkəran şəhər mərkəzi stadionunun direktoru Höccət Hacıyev isə oyunun Bakıya keçirilmə səbəbindən xəbərsiz olduğunu deyib. O bildirib ki, təmir işlərini özbaşına aparmayıblar: “Təşkilat Komitəsi bizə heç bir səbəb göstərmədən ¼ final matçını Bakıda keçirmək istədiyini dedi. Biz də etiraz etmədik. Qaldı ki, təmir işlərini özbaşına yox, klub rəhbərliyinin göstərişi ilə aparmışıq. Düzdür, qrup mərhələsinin ilk 2 oyunu zamanı ot örtüyündə problemlər var idi. Amma 3-cü matçda bu çatışmazlıqlar aradan qalxmışdı”.
Qeyd edək ki, Lənkəran şəhər mərkəzi stadionunda Fransa – ABŞ (0:0), Azərbaycan – Nigeriya (0:11) və Almaniya – Uruqvay (5:2) matçları baş tutub. Oktyabrın 5-də Almaniya və Braziliya yığmaları arasında oynanılacaq ¼ final qarşılaşması isə 8-ci km stadionuna keçirilib.
lent.az
