Dünya Futbolu

Kuarejma: “Beşiktaş”dan başqa klubda oynamaram”

31.05.2019 , 14:02

Portuqaliya millisinin və Türkiyənin “Beşiktaş” komandasının futbolçusu Rikardu Kuarejma gənclər və idman naziri Azad Rəhimovla görüşdən sonra jurnalistlərin suallarını cavablandırıb.

Həmin müsahibəni təqdim edirik:

– Səfərinizin əsas məqsədi nədən ibarətdir?

– Mən Azad Rəhimovun qonağıyam və Bakını ailəmlə birlikdə gəzməyə gəlmişəm. Əvvəllər də burada olmuşdum, indi daha da gözəlləşdiyini görürəm. Dünən axşam Bakıya çatdığımdan, şəhəri elə də çox gəzmək imkanım olmayıb. İlkin təəssüratlarım çox yaxşıdır. Şəhər çox gözəldir. Bir neçə gün burada olacaq və ailəmlə gəzəcəyəm.

– “Beşiktaş”da qalacaqsınızmı? 

– “Beşiktaş” mənim evimdir, klubu çox sevirəm və karyeramı orada bitirmək istəyirəm.

– Neçə yaşınıza qədər futbol oynamağı düşünürsünüz?

– Özümü sağlam hiss etdiyim müddətdə futbol oynamağa davam edəcəyəm. Hazırda durumum yaxşıdır və hələ futbol oynayacağam.

– Karyeranızı Azərbaycanda davam etdirmək istəyərdinizmi? 

– Hələ ki, “Beşiktaş” ilə davam edən müqaviləm var və bu klubu çox sevirəm. Karyeramı da “Beşiktaş”da bitirmək istəyirəm.

– “Fənərbağça” klubunun sizə təklifi olduğu deyilirdi, bu barədə nə deyə bilərsiniz?

– Satılıq futbolçu deyiləm, mənim üçün pulun məbləğinin önəmi yoxdur. Türkiyədə “Beşiktaş”dan başqa klubda oynamaram.

– Bakıda keçirilən Avropa Liqasının final matçını izlədinizmi

– Matçı izlədim, çox maraqlı oyun oldu. Əvvəllər “Çelsi”də oynadığım üçün onların qələbəsinə sevindim. (sportfm.az)

Son yazılar

Yuxarı