"Üç xal bizə çox vacib idi. Buna görə də çox sevinirəm. Komanda bu gün çox yaxşı oynadı. Düzdür, rəqibimiz yaxşı futbol sərgiləsə də, biz öz oyunumuzu göstərməyə çalışdıq. "Kəpəz”in heyətində Dario Frederiko yaxşı çıxış edirdi. Sonuncu dəqiqədə vurduğumuz qola daha çox sevindim. Növbəti oyunlarda daha yaxşı çıxış etməyə çalışacağıq”.
Korner.az-ın futbol11.az-a istinadən yaydığı xəbərə görə, bu sözləri "Neftçi"nin baş məşqçisi Elxan Abdullayev Topaz Premyer Liqanın 7-ci turunda "Kəpəz"ə 2:0 hesabı ilə qalib gəldikləri oyundan sonra deyib.
Daha sonra o, jurnalistlərin suallarını cavablandırıb.
– Çempionatdakı fasilə zamanı millinin düşərgəsində olacaqsınız. Bu, komandaya təsir etməyəcək?
– Biz proqramla işləyirik. Mən bilirəm ki, qarşıda necə proqramım var. Fasilə bizim üçün yaxşıdır. Məncə, həmin fasilədə nəyisə düzəldə biləcəyik.
– Azarkeşlər komandanı 90 dəqiqə ərzində təhqir edirlər. Buna fikriniz necədi?
– Mən bu sözləri eşitmirdim. Elə bilirdim ki, azarkeşlər komandaya dəstək olurlar. Fikrimcə, onları başa düşmək olar.
– Azarkeşlər Araz Abdullayevin kapitan olmasından narazıdırlar. Qarşıdakı günlərdə komandanın kapitanını dəyişmək fikriniz yoxdu?
– Bir həftə bundan qabaq azarkeşlərlə görüşümüz olub. Kapitan dəyişməklə deyil ki…Azarkeşlərin sözü ilə oturub-durmaq fikrim yoxdur. Mən Arazın oyunundan çox razıyam. Ancaq bilmirəm ki, azarkeşlərlə Araz arasında nə baş verib.
– Mahir Şükürovun "Neftçi”dəki rolu nədən ibarətdir?
– Sadəcə, komandamızda məşq edir. Onun gənc futbolçularımıza xeyiri dəyir.
– Mahir komandada "ağsaqqal” rolunu oynayırmı?
– Komandanın "ağsaqqal”ı mənəm. Sabah Mahir formasını bərpa etsə və başqa komandada oynamaq istəsə, ona icazə verəcəm. Təbii ki, qarşıdakı yoxlama oyunlarında ondan istifadə edəcəyəm.
