Topaz Premyer Liqasında IV turun “İnter” – “Kəpəz” (3:2) oyunundan sonra keçirilən mətbuat konfransında qonaq komandanın baş məşqçisi Şahin Diniyev jurnalistlərin suallarını cavablandırdı.
O, əvvəlcə matç barədə fikirlərini bildirdi:
– Belə oyundan sonra danışmaq çətindi. Komanda yeni qurulub. Yayda heyətə 15 yeni futbolçu qoşuldu. Əvəzedici heyətdən, I Diviziondan uşaqlar gətirmişik. Onların da ustalıq səviyyəsi o qədər də yüksək deyil ki, tez bir zamanda uyğunlaşsınlar. Bunun üçün hələ vaxt lazımdı. Bu gün əvvəlki üç turla müqayisədə daha yaxşı hücum etdik və təhlükəli vəziyyətlər yaratdıq. Təəssüf ki, bunlardan istifadə olunmadı. Bizdə oyunun taleyini dəyişəcək oyunçular yoxdu. Çalışacağıq, komandanı bu vəziyyətdən çıxaraq. Bütün məsuliyyəti mən daşıyıram. Sonuncu pillə “Kəpəz”ə yaraşmır.
– Azər Məmmədov ikinci hissəni niyə tribunada izlədi?
– Əvəz edəndən sonra nə baş verdiyini bilmədim. Əvəz edilməsi onun zəif oyunu ilə əlaqədar deyildi. əvvəldən müdafiədə sıx oynamaq istəyirdik. Ancaq buraxılan qollardan sonra hücum lazım idi. Buna görə də Azəri meydandan çxardıq. Bundan sonra oyunu hardan izləməsinin fərqi yoxdu.
– Əliyar Ağayev sizə yaxınlaşıb iradını bildirdi. Ancaq siz ona nəsə dediz və gülərək ordan aralandı. Aranızda necə dialoq yaşandı?
– Mən heç vaxt qaydaları pozmuram. O da mənə irad bildirmədi. Sadəcə qısa dialoqumuz oldu və zarafatlaşdıq.
