Lənət şeytana yenə alınmadı… Yenə mərhələ ümidlərimiz sona qaldı. Yoxlama görüşündə darmadağın edilən “Mura” siz düşündüyünüz “Mura” deyilmiş…
Hər şeydə “Mura”nı üstələyən “Bakı” bunu nəticədə göstərə bilmədi. Oyunsonrası mətbuat konfransında isə Novruz Əzimov konkret nə danışdığını bilmədi.
Rəqib komandanın baş məşqçisi deyir ki, bizim formamız yox idi gətirməyə. Əzimov qarşılığında: “Bu bir hiyləgar addımdı” – deyir. “Mura”nın baş məşqçisi deyir ki, biz peşəkar komanda deyilik. Yenə Əzimov buna cavab olaraq: “Peşəkar komanda olmasaydılar, Avroliqada oynamazdılar” – deyir.
Sloveniyalıların çalışdırıcısı deyir ki: “Bizim həkim personalımız yox idi. Bəzi futbolçular komanda da müqaviləsiz oynayır”. “Bakı”nın baş məşqçisi: “Bu bir strategiyadı” – deyir və ardından susur.
Tutaq ki, bu bir strategiyadı, taktikadı, hiyləgər addımdı-nədi, ondandı… Amma “Mura”nın baş məşqçisinin yox, elə Əzimovun özünün. Kişinin oğlu problemlərindən danışır, bizimki isə elə “dirəşib” ki, mən deyəndi… Qoy siz deyən olsun, Novruz müəllim. Onsuz da Avroliqa oyununa bizim birinci divizion klubu “Lokomotiv”in formasıyla və məşq etmədən birbaşa çıxan yarı-həvəskar komandayla oyunda qolsuz heç-heçəyə bundan başqa don geyindirmək olmazdı.
“Mura” ilə heç-heçədən sonra siz görün klubun içraçı-direktoru Yaşar Seyidov nə deyir. “Biz formanı onlara verməyə bilərdik. Lakin bu halda onlara 0:3 hesablı məğlubiyyət verilərdi UEFA tərəfindən”. Deməli, “Bakı” mərhələ şansını Sloveniyaya saxlamaya bilərdi. Ay qardaş, əlinə imkan düşüb, yararlan da. Yoxsa: “Bizə halal qələbə lazımdı” – deyib özünü güldürmə. “Buduçnost”la oyunu xatırlayın… “Bakı” hər iki görüşdə qələbə qazansa da, transfer siyasətində buraxılan “quş” sonda qıraqda qalmağınıza səbəb olmuşdu.
Hə, halallıqdan danışırıqsa… Bir də ölkə kubokunun “Xəzər Lənkəran”la final oyunu var, məsəlçün…
“Xəzər Lənkəran” demişkən, Cənub təmsilçisi yenə özü üçün tarix yaza bilmədi. Yunis Hüseynov oyundan öncə necə iddialı danışmışdısa, elə qarşılaşmadan sonra da öz ampluasında idi. Avropada heç nə edə bilməyənlərin yekə-yekə danışmağından olmaya da…
Mərhələ adlamaq şansını Estoniyaya saxlayan “ağ-yaşıllar”ın bu turu adlamamış gələn turdan, “Lex”lə oyundan danışan məşqçiləri var…
Kaş Avropa arenasında 11 oyun keçirən və qələbə üzünə həsrət qalan klubun baş məşqçisinin iddiası reallığa uyğun olaydı. Hüseynov heç dəyişməyib, “çempion da olajıyıx, kuboku da alajıyıx” deyəndə Hüseynov “Karvan”da işləyirdi və həmin il havadan başqa heç nə ala bilməmişdi. İndi də arxı hoppanmamış, çaya meydan oxuyur. Bu, sadəcə onsuz da əsəbləri tarıma çəkilən azarkeşlərlə, jurnalistlərlə “məzələnməkdi”.
Qələbəniz mübarək yazmalıydım, amma… Məzəniz mübarək!
