“Keşlə” Milinkoviçi Tərlan Əhmədovla əvəzləyir
18.10.2018 , 17:29
Transfer pəncərəsi bitdikdən sonra da heyətdə dəyişikliklərə davam edən “Keşlə” bununla kifayətlənməyəcək. Tezliklə komandada yeni baş məşqçi görə bilərik.
Klubdaxili ab-hava yüksək deyil. Nəticələr rəhbərliyi narazı salıb və komandanın TPL-də sonuncu olması mövsümün əvvəlində gətirilən Mladen Milinkoviçin stolunu laxladıb. Serb mütəxəssis özü də qalmaqda ciddi maraq göstərmir.
Bel bir məqamda komandaya yeni baş məşqçi gətirilməsi müzakirə olunub. “FutbolPress”in əldə etdiyi məlumata görə, “Keşlə” rəhbərliyi bu posta Tərlan Əhmədovu gətirmək niyyətindədi. Artıq müzakirələr gedib və onun namizədliyi üzərində dayanılıb. Təcrübəli mütəxəssisin özünün buna necə yanaşdığı barədə hələlik məlumat yoxdu.
Son olaraq “Neftçi”ni çalışdıran Tərlan Əhmədov ötən mövsüm bitdikdən sonra komandadan ayrılıb. Əhmədovun başa çatan müqaviləsi yenilənməyib. (futbolpress.az)
