“Neftçi”nin çilili hücumçusu Nikolas Kanales ölkəsinin mətbuatına maraqlı açıqlama verib.
Korner.az-ın məlumatına görə, Topaz Premyer Liqasının bombardiri Cənubi Amerika mətbuatına müsahibəsində bunları deyib:
“İlk dönəmlər bura Azərbaycanda tənqidlərə məruz qalmışdım. Bütün gücümü meydana qoysam da, tam özümü göstərə bilmirdim. Ancaq zamanla hər şey düzəldi.
Azərbaycan futbolunun Çilidəki ilə oxşar cəhətləri var. Orada da sürətli oyuna üstünlük verilir. Lakin fərqli cəhətlər də var. Yavaş-yavaş ora uyğunlaşıb daha yaxşı oynadım. Orada latın amerikalı futbolçuların olması həyatımı yaxşılaşdırdı.
Bu mövsüm 26 qol vurdum və bombardir oldum. Bu karyeramın ən uğurlu mövsümü idi. Bəzi oyunlarda yaxşı tamaşalar göstərməklə yanaşı sonda çempion və bombardir oldum. Üstəlik Avropa Liqasının qrupunda da oynadıq. 2004-cü ildə Çilidə qazandığım ölkə çempionluğu ilə bunu müqayisə etmək olmaz. Bunlar iki tam fərqli çempionluqdur. Çünki indi mən komandamın aparıcı oyunçusuyam və onu arxamca aparıram. Azərbaycanda populyarlaşmışam. Küçələrdə də məni tanıyırlar. Bu il 4 televiziya verilişinin qonağı olmuşam”.
Nikolas Kanales daha sonra “Neftçi”nin ona yeni təklif irəli sürdüyünü bildirib: “Neftçi” rəhbərliyi mənə yeni uzunmüddətli müqavilə təklif edib. Burada şərtlər əvvəlki ilə müqayisədə daha yaxşıdır. Lakin hələ düşünürəm. Çünki başqa ölkələrdən də təkliflər almışam. Mayın sonuna kimi gözləyəcəm. Təbii ki, burada qalıb çempionlar liqasında oynamağım da yaxşı olardı. Ümumilikdə isə Avropada daha uzun müddət oynamaq və yalnız bundan sonra Çiliyə qayıtmaq niyyətindəyəm”.
