“Kəpəz”in ev oyunlarının məkanı dəyişdirildi
10.04.2023 , 14:27

Peşəkar Futbol Liqası “Kəpəz”in 2 ev oyununun məkanını dəyişib.
Korner.az xəbər verir ki, bu barədə PFL məlumat yayıb.
Məlumatda, Gəncə şəhər stadionunun ot örtüyünün vəziyyəti Misli Premyer Liqasının oyunlarını qəbul etmək üçün yararlı olmadığı bildirilib.
Bununla əlaqədar Peşəkar Futbol Liqası “Kəpəz” klubunun müraciət və təsdiq məktubunu nəzərə alaraq aprel ayının əvvəlcədən açıqlanan təqvimində dəyişiklik edib.
Dəyişikliyə əsasən, “Kəpəz” aprelin 15-də “Turan Tovuz”a və aprelin 29-u “Sumqayıt”a qarşı ev oyununu Qəbələ şəhər stadionunda keçirəcək.
Renovasiya işlərinə Peşəkar Futbol Liqası tərəfindən baxış keçirildikdən sonra “Kəpəz” klubunun 33-cü turdan sonrakı ev oyunlarının Gəncədə keçirib-keçirməyəcəyinə yekun qərar veriləcək.
