“Kəpəz”də maliyyə problemi – “Sponsor” maaşları gecikdirir
21.02.2026 , 09:30
“Kəpəz”in çətin günləri davam edir. “Sponsorlu” klub yenə maliyyə problemi ilə üzləşib.
Gəncə təmsilçisi öhdəliklərini yerinə yetirə bilmir. DTX tərəfindən həbs olunan Adnan Əhmədzadənin ölkədəki ən yaxın adamı Adil Vəliyevin İdarə Heyətinin sədri olduğu klubda yanvar ayının maaşı verilməyib. Futbolçular, məşqçilər, texniki və inzibati işçilər məvacibi gözləyə-gözləyə qalıblar.
Maraqlıdı ki, rəhbərlik gecikmənin səbəbini AFFA tərəfindən dotasiya edilən maliyyənin klubun hesabına hələ də köçürülməməsi ilə izah edib. Yəni pulu yubadan federasiyadır. Qəribə deyilmi, “Kəpəz”ə sponsor kimi gələn adamlar niyə bu problemi özləri aradan qaldıra bilməyib AFFA-nı işarə edirlər. Bununla da quruma klubda nifrət yaradırlar.
Sədrin müşaviri Fərman Əlizadə tərəfindən bu həftənin ilk günündə maaşların veriləcəyi vəd olunsa da, rəsmilər növbəti dəfə yalançı çıxıblar. Əldə etdiyimiz məlumata görə, məvacibləri gecikən futbolçular “Sabah” ilə oyun üçün məşqlərə laqeyd yanaşaraq bununla rəhbərliyə mesaj göndəriblər. Bir sözlə, kollektivdə ruh düşkünlüyü hökm sürür.
