“Günəşli havanı sevdiyim üçün Azərbaycana tez uyğunlaşdım. Qışda Bakıda 2-5 dərəcə isti olur. Azərbaycanla Polşa tam fərqlidir. Məşqləri çox vaxt axşamlar edirik. Ötən mövsüm “Kopenhagen”lə ÇL-in pley-off matçı zamanı rəqib komanda 30-cu dəqiqədən sonra tükənmişdi. İsti hava onlara təsir etmişdi.Həmin gün oyun 20:00-da başlamışdı, havanın temperaturu isə 37 dərəcə idi”.
Bu sözləri “Qarabağ”ın müdafiəçisi Yakub Jezniçak söyləyib. 31 yaşlı futbolçu bir çox məsələlərə toxunub. O, “Qarabağ”a gələrkən ehtiyatlanmadığını bildirib: “Təklif gələndə məşqçim Yaçek Maqyero ilə danışdım. O, həm də dostumdur. O, mənə legioner həyatı yaşamaq üçün son şansımın olduğunu dedi. “Qarabağ” hər mövsüm avrokuboklarda çıxış edir. Ötən il ÇL-in qrupunda oynadıq. Başqa ölkədə, mühitdə çıxış etmək istədim. Baxmayaraq ki, özümü “Legiya”dan başqa komandada görmürdüm”.
Jezniçak Azərbaycan və Polşa çempionatılarını müqayisə edib: “Fərqli çempionatlardır. Azərbaycanda “Qəbələ” və “Qarabağ” digər klubları üstələyir. Bu iki komanda Polşada ötən mövsüm qızıl medallar uğrunda yarışa bilərdi. Digər 6 komanda isə aşağı yerlərdə qərar tutardılar”.
Təcrübəli futbolçu Polşanın dünya çempionatındakı şansları haqda da danışıb: “Dünya çempionatı ən böyük turnirdir. Dünyanın ən güclü komandaları mübarizə aparır. İlk iki oyundan çox şey asılı olacaq”.
