Avropa Liqasının qrup mərhələsində "Neftçi"nin rəqibi olan "İnter" klubunun rəsmiləri Bakıya gəlib. Korner.az-ın klubun rəsmi saytına istinadən verdiyi məlumata görə, klubun baş katibi və təşkilatı işlər üzrə direktor Umberto Marino, eləcə də səyahət departamentinin rəhbəri Serxio Villalobos ölkəmizə səfərdədir.
İtaliyalı nümayəndələr qarşılaşmanın keçiriləcəyi Tofiq Bəhramov adına Respublika stadionuna baxış keçiriblər. Qonaqlara stadionda aparılmış yenidənqurma işləri ilə bağlı məlumat verilib.
"İnter" klubunun baş katibi və təşkilatı işlər üzrə direktoru Umberto Marino “Neftçi”nin rəsmi saytına açıqlamasında arenada gördüklərindən yaxşı mənada təəccübləndiyini gizlətməyib: "Burada gördüyümüz şərait təəssüratlarımızı yaxşı mənada dəyişdi. Səmimi deyirəm ki, belə təsəvvür etmirdik. Stadionun ot örtüyü, paltardəyişmə və digər inzibati otaqlar, media mərkəzi yüksək tələblərə cavab verir. Deyərdim ki, “Neftçi” Avroliqada ev oyunlarını fantastik arenada keçirəcək. Əminliklə söyləyə bilərəm ki, "İnter" burada problemlə üzləşməyəcək".
Qeyd edək ki, "Neftçi" – "İnter" matçı oktyabrın 4-də Tofuq Bəhramov adına Respublika stadionuna keçiriləcək.
