Futbol üzrə Avropa Liqasına hazırlaşan Bakının “İnter” klubu 6 futbolçu ilə yollarını ayırıb. Korner.az-ın klubun rəsmi saytına istinadən verdiyi məlumata görə, baş məşqçi Kaxaber Tsxadadze Girts Karlsons, Danildo Assioli, Bronislav Çervenka və Enyo Krastovçevlə vidalaşıb.
Son yarım il ərzində “Simurq”da icarə əsasında çıxış etmiş Ruslan Poladov və Dmitri Kramarenko ilə müqavilə müddəti uzadılmayıb. Baçana Tsxadadze, İlia Kandelaki, Giorgi Lomaya və Samir Zərgərovla isə yeni anlaşma əldə olunub. Həmçinin “Simurq”da icarə əsasında oynayan Rüstəm Abbasovun da “İnter”ə qayıdacağı gözlənilir. Hazırda “İnter”lə müqavilə müddəti başa çatmış digər futbolçularla da danışıqlar aparılır. Bu səbəbdən, daha bir neçə futbolçunun klubu tərk edəcəyi istisna olunmur.
Qeyd edək ki, “İnter” bu mövsüm Unibank Premyer Liqasını 3-cü pillədə başa vurub.
