Unibank Premyer Liqanı 3-cü pillədə başa vuran “İnter” klubu bir sıra statistik göstəricilərlə yadda qalıb.
Korner.az-ın klubun rəsmi saytına istinadən verdiyi məlumata görə, "İnter"də mövsümün rekordçusu meydanda 2610 dəqiqə keçirmiş qapıçı Giorgi Lomaya olub.
O, “İnter”in qapısını 29 matçda 90 dəqiqə qoruyub və bu oyunlarda cəmi 18 top buraxıb (orta hesabla hər oyuna 0,620 qol). Bundan başqa, gürcüstanlı qolkiper daha bir maraqlı göstərici ilə də fərqlənib.
Belə ki, o, “İnter”in qapısına təyin edilmiş 5 onbirmetrlik cərimə zərbəsindən 3-cünü dəf etməklə də yadda qalıb. Onun penaltiləri dəf etmək göstəricisi 60 faizlik yüksək səviyyəyə bərabərdir. Xatırladaq ki, G.Lomaya Aleksandr Şoliçin (“Bakı” FK), Con Pelunun (“Rəvan”) və Bahadır Nəsimovun (“Neftçi”) penalti zərbələrini dəf edib.
Digər gürcüstanlı müdafiəçi Valeri Abramidze isə Lomayadan bir qədər az – 2605 dəqiqə meydanda görünmüşdü. Siyahıda sonrakı pillələri isə bu futbolçular tutur: Vladimir Levin (2430 dəqiqə), İlia Kandelaki (2351 dəqiqə), Arif Daşdəmirov (2296 dəqiqə) və Bronislav Çervenka (2054 dəqiqə). Yeri gəlmişkən, 36 yaşlı çexiyalı Unibank Premyer Liqanın ən yaşlı legioneri olub.
