Azərbaycan Premyer Liqasında 12-ci turun “Sumqayıt” – “İnter” matçında "bankirlər"in azarkeşləri və ev sahiblərinin kapitanı Samir Abbasov arasında xoşagəlməz insident baş verib.
Korner.az-ın məlumatına görə, hadisə ilə bağlı paytaxt klubu bəyanat yayıb.
"İkinci hissədə “Sumqayıt”ın futbolçusu komandamızın azarkeşlərini təhqir etməyə başlayıb. Təəssüf ki, münaqişə matçdan sonra da davam edib. Belə ki, ev sahiblərinin kapitanı müsahibələrinin birində 3 il müddətində çıxış etdiyi klubumuz haqqında mənfi fikirlərə yer verib və azarkeşlərimizi təhqir edib.
Samir Abbasov həm sıralarında çox sayda uşaqların olduğu azarkeşlərimizə, həm də “İnter”ə qarşı hörmətsizlik etmişdir. Halbuki məhz bizim komandamızın heyətində ölkə çempionu olub və bir neçə il ərzində “İnter”dən əmək haqqı alıb.
Belə bəyanatlar peşəkar futbolçu üçün yolverilməzdir. Belə “küçə söyüşləri”lə Samir Abasov nəinki “İnter”ə, həm də Azərbaycanın bütün futbol içtimaiyyətinə qarşı hörmətsizliyini nümayiş etdirib.
“İnter” PİK-in rəhbərliyi “Sumqayıt” FK-nın rəhbərliyindən kapitanı haqqında ölçü götürməsini xahiş edir. Bundan başqa, biz Samir Abbasovdan “İnter”in Azarkeş Klubundan üzr istəməsini də tələb edirik!".
