Topaz Premyer Liqasının 27-ci turunda “Simurq”la qarşılaşacaq "İnter" oyunun hazırlıqlarına başlayıb.
Korner.az-ın klubun saytına istinadən verdiyi məlumata görə. “Qarabağ”la(3:2) keçirilən səfər oyunundan sonra “İnter”in futbolçuları “Şəfa” stadionunda bərpa məşqinə çıxmışdılar. Dünən isə komandaya birgünlük istirahət verilmişdi.
Artıq bu gün Kaxaber Tsxadadzenin yetirmələri yenidən “Şəfa” stadionunda bir araya gələrək gün ərzində iki dəfə məşq etiblər. Sabah daha bir məşqin keçirilməsi planlaşdırılır.
Məşq prosesində “Qarabağ”la oyunda zədə almış Vladimir Levin iştirak etməyib. Kapitanın “Simurq”la keçiriləcək oyunda iştirakı sual altındadır. Bundan başqa, sarı vərəqə limitini keçdiklərinə görə Arif Daşdəmirov, Asif Məmmədov və Fuad Bayramov zaqatalılarla oyunda meydançaya çıxa bilməyəcəklər.
Qeyd edək ki, “İnter”-“Simurq” qarşılaşması aprelin 20-də “Şəfa” stadionunda baş tutacaq.
