Topaz Premyer Liqasında çıxış edən Bakı “İnter”i adını dəyişib. Dünən IX tur çərçivəsində keçirilən “Səbai”lə (0:1) matçdan sonra komanda rəsmən “Keşlə” adını götürüb.
Bu barədə klubun mətbuat xidmətinin rəhbəri məlumat verib. Göy və ağ rəngli formalarda çıxış edən klub rənglərini də dəyişib. Bundan sonra “Keşlə” klubu ağ və qırmızı futbolkalarda matçlara çıxacaq.
“İnter” futbol komandasının tarixi 1997-ci ildən başlayır. Azərbaycanın özəl ali təhsil ocaqlarından olan Xəzər Universitetində həmin il eyniadlı komanda yaradılmış və həvəskarlar liqasının sırasına qoşulmuşdur. Növbəti mövsümdə də (1998/1999) “Xəzər Universiteti” Həvəskarlar liqasında oynamışdır. 1999/2000 mövsümündə isə “Xəzər Universiteti” Azərbaycan çempionatının güclülər dəstəsində oynamağa başlamışdır. Yüksək liqada debütü 11-ci yerlə nəticələnən komanda 2000/2001 mövsümündə 7-ci, 2001/2002 mövsümündə isə 3-cü yeri tutmuşdur. 2002/2003 mövsümünün ölkə birinciliyi keçirilməmişdir. 2003/2004 mövsümündə “Xəzər Universiteti” uğurla çıxış etmiş və Azərbaycan çempionatını 4-cü pillədə başa vurmuşdur.
