Premyer Liqanın I turunun qarşıdan gələn “İnter” – "Qarabağ" görüşü hər iki komanda üçün sayca 28-ci olacaq.
Korner.az– ın klubun rəsmi saytına istinadən verdiyi məlumata görə, bunadək komandalar bir-birilə 27 dəfə qarşılaşıb.
22 oyun çempionat çərçivəsində keçirilib və 5 oyun isə kubok turnirinin payına düşür. “İnter” rəqibini 10 dəfə məğlub edə bilib, “Qarabağ” da 10 dəfə dqələbəyə sevinib. Qalan 7 matçda tərəflər meydandan sülhlə ayrılıblar. Vurulan topların fərqi bərabərdir – 21:21.
Komandalar ilk dəfə 2004-cü ilin noyabr ayında çempionat çərçivəsində üz-üzə gəlib. Həmin görüş 3:1 hesabıyla Ağdam təmsilçisinin xeyrinə başa çatıb. “İnter” və “Qarabağ” qarşıdurmasında ilk qolun müəllifi rəqibin forvardı Vadim Vasilyev olub və o, bu qolu penalti zərbəsindən vurub.
Xatırlardaq ki, ötən mövsümdə komandalar dörd dəfə qarşılaşıblar. İlk oyunda "Qarabağ" 1:0 hesabıyla qalib gəlib. İkinci qarşılaşma isə qolsuz bərabərliklə başa çatıb, üçüncü oyunda da tərəflər meydandan sülhlə ayrılıblar – 1:1. Dördüncü oyunda isə sevinən tərəf yenə "Qarabağ" olub – 1:0.
“İnter” – “Qarabağ” oyunlarında ən populyar hesab 1:0-dır. Bu nəticə 27 oyundan 15-də qeydə alınıb. Maraqlıdır ki, qarşılaşmaların tarixində darmadağın hesab qeydə alınmayıb, yalnız iki dəfə komandalara bir-birini 2 top fərqilə qalib gəlmək müyəssər olub.
Azərbaycan çempionatında "Qarabağ"a qarşı keçirilən ev oyunlarında “İnter” üstünlüyə malikdir. Belə ki, 11 qarşılaşmada "bankirlər" 6 dəfə rəqibini məğlub etməyi bacarıb. 3 oyun heç-heçə başa çatıb və 2 dəfə Ağdam təmsilçisi qələbə qazanıb. Bu qarşılaşmalarda top fərqi “İnter”in xeyrinədir – 10:6.
Qeyd edək ki, "İnter" – "Qarabağ” matçı avqustun 5-də keçiriləcək. Oyun saat 20:00-da başlayacaq.
