“Xoşdu ki, “İnter”in müxtəlif yaş qrupları üzrə komandaları çempionatın final mərhələsinin iştirakçılarıdı. Ümid edirəm ki, kiçik yaş qrupumuz çempionluq uğrunda mübarizə aparacaq”.
Korner.az-ın məlumatına görə, bu sözləri “İnter” Uşaq-Gənclər Futbol Məktəbinin inkişafı üzrə layihə rəhbəri Valentin Xodukin deyib.
Klub radiosunun qonağı olan ukraynalı mütəxəssis uşaq komandalarının uğur qazanmasını istədiklərini bildirib: “Bizim 1999-cu və 2000-ci il təvəllüdlü uşaqlardan ibarət çox yaxşı komandalarımız var. Bizim medallar uğrunda mübarizə aparan əsas komandalar da bunlardı. Bəli, uşaq futbolu çətin proqnozlaşdırılır, ancaq “İnter”in uşaq komandalarının uğur əldə etməsini çox istəyirik”.
Bunda başqa, Xodukin bu yay Bakıda keçiriləcək İBA U-14 Cup turniri barədə danışıb: “Turnir iştirakçılarının tərkibi çox güclüdü. Etiraf edim ki, püşkatmadan bir az qorxuram, bilmirəm, “İnter”ə hansı rəqib düşəcək. Bizim əsas məqsədimiz Avropanın müxtəlif güşələrində və ölkələrində futbolun səviyyəsinə baxmaqdan ibarətdi. Buna görə də turnirin coğrafiyası belə genişdi. Düşünürəm ki, hər keçən il bu turnirin səviyyəsi güclənəcək. Sizə maraqlı faktı deyim: bu yaxınlarda, turnir iştirakçılarının tərkibi tam məlum olandan sonra “İnter” PİK-in prezidentinə İsveçrənin ən tanınmış klublarından biri olan “Bazel”dən zəng gəlmişdi. Bu klubun nümayəndələri bizim turnirdə iştirak etmək istədiklərini bildirmişdilər. Qeyd edim ki, turnir haqqında məlumatı öz kanalları vasitəsilə öyrənmişdilər”.
Söhbətin sonunda V.Xodukin Premyer Liqa barədə də fikirlərini açıqlayıb: “Çempionat çox gərgin keçir. Final mərhələsi 3 rəqabətqabiliyyətli komandanı müəyyənləşdirdi. “İnter”, “Neftçi” və “Qarabağ” komandaları final mərhələsində digər komandalardan daha üstün görünürlər. Lakin bu mübarizənin yekun nəticəsini demək çox çətindir, axı heç kim sonluğun necə olacağını bilmir”.
