“Yaxşı nəticə qazanmaq niyyətindəyik. Ancaq bunun nə dərəcədə alınacağını zaman və oyun göstərəcək”.
Bu sözlər Serbiyanın “Mladost” klubunun baş məşqçisi Nenad Milavanoviçə məxsusdur. Luçani təmsilçisi bu gün Avropa Liqasının I təsnifat mərhələsinin ilk oyunları çərçivəsində Bakının “İnter” klubunu qəbul edəcək. Oyundan bir gün öncə keçirilən mətbuat konfrasında iştirak edən baş məşqçi fikirlərini bildirib. O, yaxşı nəticə qazanmaq üçün əllərindən gələni edəcəklərini deyib:
“Ötən mövsüm xəyal etdiyimiz Avropa Liqasına vəsiqə qazandıq. Ümid edirik ki, qarşımıza qoyulan məqsədə çata biləcəyik”.
“Rəqibimizi yaxşı analiz etmişik, bir neçə oyunlarını izləmişik. Bilirik ki, “İnter” müdafiədə mükəmməl oynayır və biz oyunumuzu buna görə qurmuşuq. Düzdü, planımızın nə dərəcədə alınıb-alınmayacağını demək bir qədər çətindir. İstəyimiz ilk oyunda cütün taleyini həll etməkdir”.
