“İnter”in Avroliqanın II təsnifat mərhələsində Yunanıstanın “Asteras” klubu ilə iyulun 19-da keçirəcəyi oyun avrokuboklarda 11-ci matçı olacaq.
Korner.az-ın klubun rəsmi saytına istinadən verdiyi məlumata görə, "bankirlər" avrokuboklar çərçivəsində keçirilən 10 oyunda 3 qələbə qazanıb, 3 görüşü heç-heçə başa vurub və 4 görüşdə rəqibə uduzub. Vurulmuş və buraxılmış topların fərqi-12:10 "İnter"in xeyrinədir. "İnter"in avrokuboklarda əldə etdiyi ən böyükhesablı qələbə bu mövsüm "Trans"la oyunda qeydə alındı: 0:5. Ən böyükhesablı məğlubiyyətlə isə komanda 2008/09 və 2009/10 mövsümlərində üzləşib: "Partizan"-"İnter" 2:0 və "İnter"-"Spartak Trnava" 1:3.
Xatırladaq ki, "İnter" qitəmiqyaslı yarışlarda ilk dəfə 2008-ci ildə çıxış edib. O zaman komanda Çempionlar Liqasında oynayaraq ilk cəhddən mərhələ keçməyi bacarmışdı. Növbəti mövsümdə "İnter" UEFA Avropa Liqasında debüt etsə də, elə birinci mərhələdə turnirdəki çıxışını başa vurmuşdu. 2010/11 мövsümündə komanda yenidən Çempionlar Liqasında mübarizə aparmışdı, amma dramatik ssenari altında Polşanın "Lex" klubuyla keçirilən matçlarda bəxt "İnter"dən üz döndərib. Bu mövsüm isə Kaxaber Sxadadzenin yetirmələrinə artıq Avroliqada bir mərhələ keçmək müəssər oldu və indi "İnter" daha bir rəqibinə qalib gələrək klubun tarixində avrokuboklardaki ən yaxşı nəticəyə imza ata bilər.
