“İnter”ə pis xəbər: Dumfris martadək meydanlardan uzaq qalacaq
16.12.2025 , 21:01
“İnter”in sağ cinah müdafiəçisi Denzel Dumfrisin zədədən bərpası planlaşdırılandan daha uzun çəkəcək.
Korner.az xəbər verir ki, niderlandlı futbolçunun aldığı xəsarət ilkin ehtimallardan daha ciddi olub.
Noyabrın 9-da “Latsio” ilə keçirilən qarşılaşmada topuğundan zədələnən Dumfrisin durumunun yüngül olduğu düşünülürdü. Lakin 29 yaşlı futbolçunun ağrıları keçmədiyindən həkimlər əməliyyat qərarı veriblər. Müdafiəçinin yalnız gələn ilin mart ayında meydanlara dönəcəyi gözlənilir.
Xatırladaq ki, “İnter” Dumfrisi 2021-ci ilin yay transfer pəncərəsində PSV-dən heyətinə qatıb. Niderland millisinin üzvü cari mövsümdə Milan klubunun heyətində bütün turnirlərdə 17 oyuna çıxaraq 3 qola imza atıb.
