İlqar Rəhimov milli üzvləri ilə görüşdü
10.05.2023 , 16:17
Mayın 10-da Milli Paralimpiya Komitəsinin (MPK) prezidenti İlqar Rəhimov Gürcüstanın paytaxtı Tbilisidə keçirilmiş dünya kubokunda iştirak etmiş para-pauerliftinq idman növü üzrə milli komandanın üzvlərini qəbul edib.
Korner.az xəbər verir ki, görüşdə MPK-nın prezident koməkçisi, idman şöbəsinin müdiri Kamal Məmmədov, milli komandanın baş məşqçisi Elşən Hüseynov və komandanın digər üzvləri iştirak ediblər.
Görüşün əvvəlində Ümummilli lider Heydər Əliyevin anadan olmasının 100-cü ildönümü günündə Ulu Öndərin əziz xatirəsi yad edildi. MPK prezidenti İlqar Rəhimov qeyd etdi ki, məhz Ümummilli lider Heydər Əliyevin göstərdiyi diqqət və qayğı nəticəsində ölkəmizdə paralimpiya hərəkatı inkişaf etməyə başlamışdır.
Komitə prezidenti İlqar Rəhimov dünya kubokunun komanda üçün uğurlu olduğunu bildirib. İ.Rəhimov qeyd edib ki, Paris 2024 XVII Yay Paralimpiya Oyunlarına lisenziya qazanmaq üçün komanda qarşıdan gələn yarışlara ciddi hazırlaşaraq öz gücünü göstərməlidir. Komitə prezidenti cari ilin avqust ayında BƏƏ-nin Dubay şəhərində keçiriləcək Dünya çempionatına hazırlıqlarla bağlı baş məşqçiyə müvafiq tapşılıqlar verib və komanda üzvlərinə uğurlar arzulayıb. Komitə prezidenti bildirib ki, məqsəd nöbvəti Yay Paralimpiya Oyunlarına daha böyük heyətlə qatılıb ölkəmizi layigincə təmsil etməkdir.
Pauerliftinq üzrə milli komandanın baş məqçisi Elşən Hüseynov dünya kubokunda ədlə edilmiş nəticələrin növbəti yarışlarda da təkrarlanacağına əmin olduğunu qeyd edib. Onun sözlərinə görə idmançıların fiziki və psixoloji hazırlıqlarının artırılması məqsədilə məşqlər davam etdirilir. E.Hüseynov bildirib ki, qarşıdan gələn dünya çempionatında millimiz qarşıya qoyulan tapşırıqların öhdəsindən gəlməyə çalışacaq.
Millimiz dünya kubokunda 7 qızıl, 4 gümüş və 1 bürünc medal əldə edib.
