“Rioda keçirilən Yay Paralimpiya Oyunlarının təşkilatçılığı sıfır səviyyəsində idi. Bu məsul yarışı “Bakı-2015″ I Avropa Oyunları ilə müqayisə etmək mümkün deyil. Bütün komanda üzvlərimizə qarşı hakim haqsızlığı oldu”.
Korner.az-ın məlumatına görə, bu fikirləri Azərbaycanı Rio-de-Janeyroda keçirilən Yay Paralimpiya Oyunlarında təmsil edən bayraqdarımız İlham Zəkiyev bu gün Bakıda Heydər Əliyev adına Beynəlxalq Hava Limanında qarşılanma mərasimində jurnalistlərə açıqlamasında bildirib.
Afina və Londonda keçirilən paralimpiadaların qalibi, Londonda isə bürünc mükafatçı olan təcrübəli cüdoçu bu dəfə medalsız qlaıb. Zəkiyev uğursuzluğa belə izah verib:
“Uduzduğum özbək idmançıya paralimpiyaçı deməyə dilim gəlmir. Çünki o, 3 il əvvəl sağlam idmançıların mübarizəsində güləşirdi. Hətta onunla görüşdə belə, mənə hakim haqsızlığı oldu. Bu, bürünc medal uğrunda qarşılaşmamda da baş verdi. Üstəlik, həmin görüşə çıxanda sağlamlığımda da problem yarandı. Qan təzyiqim 80-dən 50-yə düşmüşdü. Bir az da qızdırmam vardı. Həkimkər mənə bu görüşə çıxxmağı qadağa qoydular. Hətta Bakıdan da zəng elədilər ki, bizə medal yox, sən lazımsan. Lakin rəqibim başqa şey fikirləşməsin deyə bürünc medal döyüşünə çıxdım”. Məlum olduğu kimi, İham Zəkiyev ölkə başçısı İlham Əliyevin sərəncamı ilə “Azərbaycan Respublikası Prezidentinin fəxri diplomu” ilə təltif olunub: “Bu mükafat cənab prezidentimizin idmançılara necə diqqət və qayğı göstərdiyinin bariz nümunəsidir. Bu addım məni ikiqat stimullaşdırdı. Hələ heç nə bitməyib. “Tokio-2020″də görüşərik” (sportnet.az)
