"Qarabağ"ın qapıçısı Fərhad Vəliyev "Neftçi" – "Bakı" oyunundan sonra keçirilən medalların təqdimetmə mərasimindən sonra suallarımızı cavablandırdı.
– Demək olar ki, sizin üçün mövsüm bitdi. Təəssüratlarını bilmək istəyərdim.
Mövsümün əvvəlində qarşımıza çempionluq hədəfi qoyulmuşdu. Buna yaxın olsaq da, son turlarda şansımızı itirdik. İkinci pillə də pis nəticə deyil. Mövsümü uğurlu saymaq olar.
– Səncə, çempionluğa kim layiq idi? "Neftçi", yoxsa "Qarabağ"?
Hər iki komanda çempionluğa layiq oldular. Bu mövsüm çox gərgin və maraqlı keçdi. Ümumilikdə çempionatımız inkişaf etməkdədi. Qarşıdakı illərdə daha maraqlı olacağına inanıram.
– Avrokuboklar haqqında nə düşünürsən?
Avrokuboklarda bütün komandalarımıza, o cümlədən Çempionlar Liqasında "Neftçi"yə uğurlar arzulayıram. Çalışacağıq, yeni uğurlar qazanaq. Ən pis halda, keçmişdəki nəticələri təkrarlayaq.
– Özün üçün mövsümü necə dəyərləndirirsən?
– Bu mövsüm çıxışımı uğurlu saymaq olar. Bir çox matçda əsas heyətdə çıxış etdim. Ehtiyatda qaldığım oyunlar da oldu. Məncə, pis olmadı.
– Belə çıxır ki, özündən razı qaldın.
Bəli, çıxışlarımdan müəyyən qədər razı qaldım.
Heybət Məmmədov
