DÇ-2014-ün seçmə mərhələsi çərçivəsində Azərbaycan yığması dünən Rusiya millisini qəbul edib.
Korner.az-ın məlumatına görə, “Xəzər Lənkəran”ın baş məşqçisi Con Toşak da oyunu izləmək üçün “Bakcell Arena”ya yollanıb.
Lakin polislər onu bileti olmasına rəğmən stadiona buraxmayıblar.
Bu barədə cənub klubunun mətbuat xidmətinin rəhbəri Hüseyn Cəbrayıloğlunun fikirlərini öyrəndik.
Klub rəsmisi saytımıza açıqlamasında bu sözləri işlədib: “Toşak dünən ilk olaraq 21 yaşlılardan ibarət millimizin oyununun izləyib. Daha sonra o əsas millinin oyununu izləmək üçün “Bakcell Arena”ya yollanıb. Əlində VIP lojaya bilet olsa da, polislər onu stadiona buraxmayıb. Oyuna 40 dəqiqə qalmış Toşakın stadiona girə bilməməsi yaxşı hal deyil. Bir həftə öncə o Uels – Makedoniya oyununa dəvət almışdı. Dünya futbolunda əfsanələşmiş bir şəxsə qarşı bu normal münasibət deyil. AFFA-dan kimsə olsaydı bu hal yaşanmazdı. Lakin bilet olsa da polislər onun qarşısını kəsiblər və o otelə qayıdaraq oyunu oteldən izləyib. Onun necə əsəbi və pərt halda olduğunun şəxsən özüm şahidi oldum. Çox yaxşı olardı ki, AFFA nümayəndələrindən kimsə Toşakı arayıb bunun sadəcə anlaşılmazlıqdan irəli gəldiyini deyəydi”.
